दाङको अक्सिजन उद्योग पुनः सञ्चालनमा ल्याइने
काठमाडौ,वैशाख २२ : कोरोना संक्रमित बढ्दै गएसंगै बजारमा अक्सिजनको अभाव हुन थालेको छ । विद्युत अभावका कारण बन्दभएको दाङको अक्सिजन उद्योग विद्युत जडान गरेर सञ्चालनमा ल्याइने भएको छ । घोराही उपमहानगरपालिका–३ झिङ्नीस्थित अक्सिजन उद्योगमा चौबीसै घण्टा विद्युत आपूर्तिका लागि तत्कालै छुट्टै लाइन जोडिने भएको छ । उपमहानगरपालिकाका प्रमुख नरुलाल चौधरीका समन्वयमा प्रमुख जिल्ला अधिकारी दीर्घनारायण पौडेल, प्रहरी प्रमुख गणेश चन्द, राष्ट्रिय अनुसन्धानका निर्देशक अर्जुन भण्डारी, नेपाल विद्युत प्राधिकरण घोराही वितरण केन्द्रका प्रमुख अमितकुमार कर्ण र अक्सिजन उद्योगका सञ्चालक टोपाराम पौडेलसहितको मंगलबार बसेको बैठकले दाङ अक्सिजन प्रालिमा तत्काल विद्युत जोड्ने निर्णय गरेको छ । ६ वर्ष पहिले अक्सिजन उद्योग स्थापना भएपनि विद्युत आपूर्ति भरपर्दो नहुँदा उत्पादन बन्द भएको थियो । जटिल अवस्थामा रहेका कोरोना संक्रमितलाई वायुप्राण अर्थात् अक्सिजनको अत्याधिक माग रहेको समयमा सरोकारवाला निकायले यस्तो निर्णय गरेको हो ।
२०७३ सालमा खुलेको दाङ अक्सिजन उद्योग प्रालिसँग दैनिक दुई सय सिलिण्डर अक्सिजन भर्न सक्ने क्षमता रहेको उद्योगका व्यवस्थापक भरत पौडेलले बताए । विद्युत नियमित भए अहिले पनि दैनिक १५० सिलिण्डर भर्न सक्ने उनको भनाइ छ । विद्युत नियमित र भरपर्दो बनाउन सके यो संकटको सामना सहजै गर्न र बिरामीको ज्यान बचाउन सकिने पौडेलले बताए । उद्योगका लागि छुट्टै फिडरको व्यवस्था भए चौबीसै घण्टा अक्सिजन उत्पादन गर्न सकिने उनको भनाइ छ । कोरोना संक्रमितका लागि दाङमा दैनिक एक हजार सिलिण्डर अक्सिजन आवश्यक पर्ने भएपनि अहिले दैनिक चार सय अक्सिजन सिलिण्डर अपुग हुने गरेको छ । पालिकाले बनाएका आइसोलेसन सेन्टर र अस्पतालमा अक्सिजन सिलिण्डरको अभाव छ । कोरोना विशेष अस्पताल बेलझुण्डीमा पछिल्लो चार दिनदेखि अक्सिजनको अभाव छ ।
